شكل مين ياترى

فتحت الfacebook وقعدت ادور على صورة آسر حفيدى علشان انزلها هنا فى البلوج الخاص بى وبما انه بقى شخص مهم على البتاع ده اللى بيسموه الفيس بوك وبدخل كتير وبيلعب مع البتس بتاعته معلهش ما حدش يسألنى ايه البتس دى لانها لعبة موجوده واكيد كلكم بتلعبوها
المهم جه على بالى سؤال ياترى الواد الوحش ده شبه مين ياترى - طالع لآبوه والا شبه مين ؟؟؟؟؟؟؟؟؟؟؟؟؟؟
حا اكمل تانى

ما بتقش امى

مصر ما بقتش امى

مصر دلوقتى مراة ابويا

قاسية عليه انا واختى واخويا

أرضها زرعها مليان سموم

حتى نيلها اللى كان فيه دواياواقعد على شطه وقت الغيوم

الاقى لمسه حنانه وانسى كل الهموم

اتغيرت فيه طعم الحياه ويا غربان الليالى اللى حوالبه تحوم

قصور بتتبنى وجنبها قصور

ما بقتش واضحة شكل الامور

أمور أهمال بتحصل زى موضوع الصخور

حريق وراه حريق والفاعل دايما مجهو

أوماس كهربائى هو اللى مسئول عن كل الشرور

الشر ماشى بخطوته بقلب جامد قوى وجسور

مش ممكن تقدر نقلعه ده أصله ممتد الجذور

صحيح ممكن الايام بكرة على الظالم تدور؟

بس الصبر فاض بالناس وعدى بحور

شوف الشباب من الهباب اللى بيتعاطوه

فعل فاضح فى قلب المدينة بيعملوه

كان زمان الاخ بيخاف على عرض اخوه

بس النهاردة ماحد بيعمل حساب حتى لأبوه

علشان أبوه باع القضية وباع معاهم اختى واخوه

ماهو ما دام امى بقت مراة ابويا يبقى ضاع

وضاع معاه وسط الزحام وطنه اللى منه سرقوه

الددنيا فيها العجب

الدنيا دى ياما فيها العجب
فيها المتربى وفيها قليل الادب
فيها اللى من الايام والليالى اتعلم الادب
وفيها اللى فارد قلوعه وناسى انه اتخلق من العدم

ناس صاحية الليالى تعبد ربها

و تبكى على اللى فات من عمرها
وناس مقضية حياتها طولها زى عرضها
وناس بتتمنى أى قبر يلمها
وناس بين الفلوس والنفوذ ضاعت معالم وشها
اصلها نسيت جذورها والأرض اللى خرجت منها
وناس تشيل الجميل وناس ترميه ورا ضهرها
وناس الخيانة والخسة فى طبعها
ما هو الطبع بيغلب أصلها
فيها ناس الكدب بيجرى فى دمهم
وفيها الغلابة كتير فى عقلهم

ناس السماحه على وشهم

عاملين حساب يوم ما يقفوا مابين ايدين ربهم

فيها اللى مستنى العدالة فى السما

وتفتح لهم طاقة نور تعوض صبرهم
فيها ناس تلاقيها زى الطبل من جوه
وفيها اللى تايه ومش عارف مين هو
فيها اللئيم وبرضه فيها اللى قلبه لبن حليب من جوه
وفيها اللى بيعتبر الطيبة ضعف مش قوة
فيها اللى جواه بلاوى ومش قادر يحكى همه
وفيها المتفرعن ومش لاقى حد يلمه

مهما تحسبها يابن ادم اخرتك فى قبرمتر × مترين وشوية تراب

شركةجنب ابوك واخوك وعمك

حته منه عليها ريح الجنة وحته تانية مليانه بالعذاب

لا لن انتظر الرحيل

لا لن انتظر الرحيل
فى حجرتين وصالة صغيرة تزوجت انجبت الابناء والبنات 00 سنوات وسنوات تمنى نفسها ان تقطن فى شقة واسعة من عدة حجرات خاصة بعد ان كبر البنات والاولاد وكان يجب ان توفر للبنات حجرة والصبيان حجره ولهما حجرة – ناهيك عن زيارات الأقارب من المدينة البعيدة والتى كان لزاماً ان تخلى لهما احدى الحجرتين لزوم كرم الضيافة 00 الى ان حقق الله امنيتها – كان الاولاد كبروا وبدأ كل منهم يشق طريقه ويبحث عن شريك حياته ، وبدأوا ينسلون من بين يديها واحدا تلو الواحدة ( سنة الحياه) تنتظرهم فى لهفة يوم العطلة الأسبوعية ليتجمعوا حولها والاحفاد - استيقظت مبكرة مهرولة الى المطبخ لتعد ما يحلو لهم من الأصناف وتتذكر هو يحب 000 وهى تحب00 محاولة جاهدة ان تواءم بين الأصناف التى سوف تعدها – وتتذكر الأصناف التى صنعتها لهم الاسبوع الماضى حتى لاتكررها - وبكل الحب والهمه بدأت العمل وهى واقفة تتذكر أحفادها 00 هاهم يتقافزون حولها 00 يطلبون الحلوى 00 العصير 00
تيته 00 ياللا نجرى 00 حول المنضدة الصغيرة تحاول ان تدور تمسك بها حفيدتها وتتعالى ضحكاتهما – مسكتك ياتيته – تجلس من التعب تنادى عليهم 00 من حبيب تيته يهرولون الى حضنها – تضمهم بشدة الى صدرها تتمنى ان تحملهم بداخله حتى لايفارقونها 00 تتذكر – ماهو أعز الولد 0000
تخطو نحو الموقد 00 هاهم يتجمعون حولها 00 الله ياماما اكلك حلو 0
تنتظر 00 وتنتظر الى ان يدخل احدهم ومعه حفيدها – ماما انتى هنا ؟
نعم يابنى انا هنا ودائماً انا هنا فى الإنتظار
طبختى ايه النهارده
الاكله اللى انت بتحبها 00
ياخساره – اصل النهارده رايحين النادى وحانتغذى هناك
فجأة تنتبه 00 اين زوجتك 000
سبقت الى هناك
والاكل اللى انا عاملاها
سيأتى باقى الاخوة بالهنا والشفا 00 ها 00 عايزه حاجه 00 سلام
يدق الهاتف 00 باقى الأخوة 000 ماما عامله ايه ؟
ايه ده انتم لسه فى البيت
معلهش ياماما اصل النهارد 00000 وتتوالى الأعذار
وتثاقلت الخطوات وتباعدت المسافات ولم يعد لديها الا الإنتظار ان يأتى احدهم صدفة وهو مار يفتح الباب وينادى عليها00 ماما انتى هنا
نعم انا هنا 00 حا اروح فين 00 انا دائماً هنا فى الإنتظار
يتجاهل مغزى الكلمات 000 انا جعان 00 عندك ايه ؟
حاضر يابنى عشر دقائق يكون الاكل جاهز 00
لا عشره كتير 00 ورايا ميعاد هنا جنبكم 00 افوت اكل فى اى محل 00
دائماً فى الإنتظار 00 يدها على خدها – انتظار ان يرن الهاتف 00 انتظار ان يفتح الباب
تفتح التلفاز 00 وهى مشغولة الفكر 00 كصوت يؤنسها فى وحدتها
تفتح المذياع 00 ليأتيها صوت الست فإذا انكر خلا خله 00 وإذا الدنيا كما نعرفها وإذا الأحباب كلا فى طريق و00مضى كلا الى غايته – لاتقل شئنا 00 ولم تفهم ولم تسمع سوى هذه الكلمات ومعانيها 00 ولم تشأ ان تترك حياتها للصدفة والحظ و000و يضيع مابقى من العمر مهما كان قصير – فإذا كان الذين تحتاجهم والذين تتمنى ضمهم الى صدرها لايحتاجونه الان وتباعدوا فلتذهب الى من هم محرومين من الحنان وفى شوفاً الى المشاعر الطيبة الفياضة فهم اولى بها وهى اولى بهم 00 ولتبدأ مرحلة جديدة – يملؤها الأخذ والعطاء لآخرين 0
اتصلت بصديقتها الوحيده 00 عامله ايه 00 كيف الأحوال 00
كما الأحوال لديك 00 مللت - ولكن لدى فكرة ارجو ان نشجع بعض عليها ما رأيك ؟
هاتى ما عندك 00
إذا كان انشغل كل منهم بحياته فلننشغل نحن ايضا بحياتنا 00 ونبحث عن من يستحقون فيض مشاعرنا فهم احق بها ونفذن ما فكرن فيه وبدأت فى الخروج والبحث عن الدور 00 تلو الدور 00 تربت على خد هذه وتحنو على ذاك – تمد يد المساعدة هنا وهناك 00 لا تشعر بمرور الوقت ، احست بأن حياتها لها معنى 00 لا بل معانى جياشه بدأت تنمو بداخلها 00 معانى حركت كل المشاعر الراكده ولأول مرة تشعر انها تعيش 00 تحيا حقيقة وليس بين الخيال ومرارة الانتظار 00 تشعر بذاتها 0
وفجأة يرن الجوال 00 رنات 00 ورنات متتابعة 00
ماما هاتف المنزل لا يرد حاولنا مراراً وتكراراً 00 خشينا ان يكون حصل لك مكروه
ماما انتى فين 00 ذهبت من يومين الى المنزل لم اجدك 00
ماما 00
ماما 00 ازاى نلاقيك 00 احنا جايين بكرة
لا بكره مش فاضية ورايا 000
طيب بعد يومين 00
لا معلهش مشغولة جداً 00 ورايا حاجات مهمة واخده كل وقتى 00
طيب ازاى نتصل بك نطمئن عليك 00
بيننا رنات جوال 000
ياااااااااااااااااااااااه وتذكرت فجأة شىء النور موجود دائماً 00 المصباح يضىء بمجرد ان تضع يدها على زر الكهرباء الثلاجة تعمل 00 التلفاز يمجرد ان تفتحه يعمل 000 كل ذلك دون ان تشعر بفائدة كل ذلك الا ان يقطع التيار عن المنزل 00 عن الحى 00 فجأة تجد الاف الأيدى تمتد الى الهاتف 00 الووووووووو شركة الكهرباء – الكهرباء مقطوعة 00 ارجوكم على وجه السرعة اصلحوا العطل 00 نحن فى حاجة شديدة وملحة اليها 00؟؟

جدى وجدك

مش عارفه ايه اللى مزعل الناس دى على اننا بنفتكر امجاد اجدادنا وانهم بنوا الاهرامات ومن غير تقدم ولا غيره تركوا لنا ثروة مش قادرين نحافظ عليها ومع ذلك فيه ناس زعلانين وبيقولوا كفايه الغنى بامجاد الماضى طيب تيجوا نعمل مقارنة بين اللى عمله جدى وجدك واللى حاصل النهارده 00 ماشى
جدى وجدك زرعوا القطن وكان من افخر انواع القطن وبشهاده العالم كله وكانوا بيسموه الدهب الابيض وكان الخواجه بياخده بتراب الفلوس
النهارده انت بتزرع القطن ومش لاقى حد ياخده منك وبيقولوا انه غير مطابق للمواصفات
جدى وجدك زرع الفمح وكان بيقضى ويفيض ياكل الناس كلها فى بر مصر
النهارده بنزرع الفمح وبرضه بيحاولوا ياخدوه بتراب الفلوس وبتقف السيارات المحمله به امام الشون والمخازن حتى يخسر التاجر والزارع دم قلبه وفى الاخر يروحوا يستوردوا قمح به سوس وعفن ومواد مسرطنه ويقولوا ان القمح اللى بنزرعه مش بيقضى
جدى وجدك دفعوا دم قلبهم فى الضرائب
واخدوها صرفوها على جراج رمسيس بناء وهدم بالملايين وما فيش حساب ولاكتاب
وصرفوها على اكتشاف البترول والغاز الطبيعى وباعوهم للاجانب برخص التراب
جدى وجدك ماتوا فى حفر القناه وابنك وابنى غرقوا وهما بيدوروا على رزقهم فى بلاد الله
جدى وجدك دفعوا التأمينات اللى قالوا عليها اجتماعية واخذوها وصرفوها على توشكى واستصلاحها وزراعتها وضاعت هباء
جدى وجدك خرجوا اليهود والاجانب من مصر وهما دخلوهم باتفاقية الجات والكويز
جدى وجدك كافحوا علشان ياخدوا ارضهم وما فيش اجنبى يحط رجله عليه
وهما اعطوهم الارض على طبق من فضه وولعت الدنيا من حولنا
جدى وجدك انشأوا القطاع العام وهما خصخصوه وباعوه للاجانب وللمستثمرين وتم طردك انت وابنك منها
قالوا معاش مبكر وخرجت ياولداه بمبلغ هزيل لايسمن ولايغنى من جوع ومعاش تتسوله كل شهر يادوب يكفى ثمن العيش والفول إذا كان
جدى وجدك محصورين دلوقت فى نومتهم وبيسألوا ياترى ايه اللى حا يجرى لك تانى
والى الحلقة القادمة

رحلة الذهاب بلا عوده

فى الوقت التى كثرت فيه حالات التهريب للسفر الى الخارج من اجل فرصة عمل ولقمة العيش وموت المئات والذهاب خلال البحر وخلال حدود الدول المختلفة مع تعرض هؤلاء الشباب لمخاطر البحر وامواجه وتعرضهم للغرق فى معظم الاحيان ومخاطر القبض عليهم من السلطات على حدود الدول المارين بها
ماذا فعلت الحكومة ازاء ذلك 00 فكل يوم نقرأ عن مثل هذه الحوادث من غرق واعتقال لمجموعة من شبابنا وهكذا
فى الوقت ذاته يتم استيراد عمالة من الخارج لصالح المصانع سواء بالمدن الجديده او داخل القاهرة بحجة ان هذه الأعمال لا يقبل عليها الشباب داخل البلد او لعدم وجود خبرة مماثلة او لاى سببا كان
ياترى الى متى سوف يظل هم المواطن المصرى فى الحصول على لقمة العيش فى بلده وخارجها والى متى ستنفرج ازمة البطالة
اين المنظمات الشبابية واين مراكز الشباب الموجودة فى كل حى وكل مدينة وقرية واين دورها فى توعية الشباب لمخاطر السفر بهذه الطريقة ؟؟
وكيف نمنع دخول العمالة التى بدأت تتواجد فى كل المجالات لدينا وماهى الشرعية القانونية لهذه العمالة
اين الجهات التدريبية على المهن المختلفة 00 والتى يفتقدها سوق العمل ويضطر ان يأتى بها من الخارج وهل اصبح فى مصر وظائف خالية لا يشغلها احد ؟
هل من الممكن ان نطلب من هؤلاء الشباب ان يتغنوا بحب الوطن او نطالبهم بالانتماء اليه
سؤال محير

نحن الى اين 00

فى جريده واحده فى اول الصفحة أقرأ الخبر
انتحار شاب عاطل عن العمل
انتحر شاب من الصعيد ذهب الى الاسكندرية - ووجد فى احدى الشقق وانتحر بقطع شرايين يده والشاب المنتحر حاصل على بكالوريوس تجاره وواضح انه ذهب يبحث عن فرصة عمل ويأس وكانت دى نهايته
اللقطة الثانية
زوج محاسب متزوج تشاجر مع زوجته وببحثه فى دولابها وجد انها متزوجه من اخر وهى على ذمته
ذهب المحاسب الى القسم وحرر محضر بالواقعة ان زوجته على ذمة اثنين
حضرت الزوجة قالت انه يعلم انها متزوجه غيره وانه الزوج الثانى وان سبب البلاغ انه تشاجر معها من اجل ان يحصل على نقودها التى تكسبها بعرق وسطها (اسفة بعرق جبينها ) من مهنة الرقص والتى تبلغ حوالى 10 الاف جنيه فى اليوم وده الكلام اللى اتكتب تقريبا بالجريده
السؤال الذى يطرح نفسه ياترى من افضل حالا فيهم صحيح انه لا وجه للمقارنة ولكن هل وصل الحال بشبابنا الى هذا

يا بلدنا يا بلد هو من امتى الولد بيخاف من امه لما تضمه